Azərbaycanda növbəti sosial islahat paketinin tərkib hissəsi kimi, Prezident İlham Əliyevin
təsdiq etdiyi yeni qanunla minimum aylıq əmək pensiyasının məbləği 2022-ci ilin əvvəlindən
20% artımla 200 manatdan 240 manata çatdırılır.
Əmək və Əhalinin Sosial Müdafiəsi Nazirliyindən Elxəbər.com-a verilən məlumata görə, minimum pensiyanın artırılması 65 min pensiyaçını əhatə edəcək. Onlardan 44 min
şəxsin pensiyaları artırılaraq 240 manata çatdırılacaq. Digərləri isə il ərzində pensiyaya
çıxacaq şəxslər olacaq ki, onlara təyin edilən pensiyanın minimum məbləği artıq 200 deyil,
240 manat təşkil edəcək. Artım üçün illik 13,2 milyon manat əlavə vəsait ayrılacaq.
Son 3 ildə reallaşdırılan sosial islahatların nəticələrindən biri kimi, minimum
pensiya 2,2 dəfə artırılaraq 110 manatdan 240 manata çatdırılıb.
2022-ci il üçün yaşayış minimumu pensiyaçılar üçün 176 manat müəyyən edilib. Bunu
nəzərə alaraq, qeyd edək ki, gələn il minimum pensiya məbləği pensiyaçılar üçün yaşayış
minimumunu 36,4% üstələyəcək.
Minimum pensiya kimi, orta aylıq pensiya da mütəmadi artmaqda davam edir. Son üç
ildə orta aylıq pensiya 60% artaraq 331 manata, yaşa görə pensiya 358 manata çatıb.