Bu gün dünyanın bir çox ölkələrində qeyd olunan bayramlardan biri-8 Mart Beynəlxalq Qadınlar Günüdür.
8 Mart - iqtisadi, ictimai və siyasi bərabərlik uğrunda mübarizədə qadınların beynəlxalq həmrəylik günüdür.
Beynəlxalq Qadınlar Gününün bayram edilməsi alman siyasətçi, qadın hüquqlarının müdafiəçisi Klara Setkinin təklifi ilə 1910-cu ildə sosialist qadınların 2-ci Beynəlxalq konfransında (Kopenhagen) qərara alınıb.
Qadınlar günü ilk dəfə 1911-ci ildə Almaniya, Avstriya, İsveçrə və Danimarkada keçirilib. Rusiyada 1913-cü ildə, Azərbaycanda isə 1917-ci ildə qeyd edilib. 1914-cü ilədək Beynəlxalq Qadınlar Günü müxtəlif günlərdə keçirilirdi.
Beynəlxalq Qadınlar Gününün martın 8-də keçirilməsi Avstriya, Macarıstan, Rusiya, ABŞ kimi ölkələrin qadınlarının öz həmrəylik gününü məhz bu tarixdə qeyd etməsindən sonra ənənənə halını alıb.
Bütün ölkələrdə qadınlar 8 Martı sülh uğrunda mübarizədə həmrəylik günü kimi də qeyd edirdilər. 1965-ci ildən keçmiş SSRİ-də 8 Mart - Beynəlxalq Qadınlar Günü istirahət günü elan olunub.
Qeyd edək ki, 1977-ci ildə BMT bu günü qadın günü kimi rəsmiləşdirib.
Azərbaycan müstəqillik əldə etdikdən sonra da 8 Mart - Beynəlxalq Qadınlar Günü ölkədə bayram kimi qeyd olunur və həmin tarix qeyri-iş günüdür.
Tarixən Azərbaycan cəmiyyətində həmişə qadının xüsusi yeri və rolu olub. Azərbaycan qadınları əsrlər boyu milli-mənəvi dəyərləri, mental xüsusiyyətləri qoruyub saxlayaraq ləyaqət və müdriklik etalonuna çevriliblər. Güclü əqidəyə malik Azərbaycan xanımları özlərinin dərin zəkası, Vətənə məhəbbəti, tükənməz istedadı ilə bu gün Azərbaycan xalqının ictimai-mədəni həyatında fəal iştirak edir, xalqa və cəmiyyətə xidmət göstərirlər. İndi Azərbaycan qadını elm, təhsil, səhiyyə, mədəniyyət, dövlət idarəçiliyi, sahibkarlıq sahəsində öz uğurları ilə müstəqil Azərbaycanın inkişafına qiymətli töhfələr verir.
8 Mart – Beynəlxalq Qadınlar Günü münasibətilə bütün xanımları təbrik edir, cansağlığı, xoşbəxtlik, firavan həyat arzulayırıq.
